قطر المميزيين...من أمثالى طبعا.

قطر المميزين .....من أمثالى طبعا

على فكرة أنا مش من القاهرة..

بس كليتى فى القاهرة ...

عشان كده لازم أسافر
القاهرة ...

وعشان كده باركب قطر القاهرة ...

مرة فى أول الاسبوع ومرة فى اخره...
باركب القطر اياه اللى انتوأكيد عارفينه ...

اللى هو بيقووا عليه مميز..

مش عارف مميز على ايه؟

يمكن عشان بيركب فيه المميزين من أمثالى طبعا...

يعنى ده قطر الناس المميزين.
على فكرة دول مش مميزين بس ....

لالالا..دول مميزين جدا..

كل واحد مميز فى
حاجه ...

لكن الغريب ان فيه ميزة واحدة يشتركوا فيها كلهم:

اللى هى الصبر

سبحان الله على
صبرهم..

لو كلنا نصبر زيهم...

ياااه دول بيصبروا صبر ...
تخيلوا ممكن الواحد منهم يقف على رجل واحده ..

ساعه.. ساعتين ..

تلاته..مفيش مشكله...

بالذمه فيه أحسن من كده..
ممكن القطر يتأخر 5 دقايق أو حتى 5 ساعات برده هيصبر لانه انسان مميز ومستنى القطر المميز .
ممكن واحد يركب على الشبكة ..

ويدلل رجليه فى وشه..

وريحة شرابه معفنه..

وبرده يصبر ..

ماهو مميز وراكب القطر المميز

ممكن واحد رخم يشغل أغنيه رخمه ..

ورغم انه رخم ..

وهى رخمه..

هيسمعها غزبا عن اللى

خلفوه ...

وبرده هيصبر ..

لانه مميز وراكب القطر المميز

ممكن واحد أرخم يولع سجارة ..

وينفخ فى وشه ..

ويكح لما روحه تطلع...

وبرده هيصبر ...

يا سلام على التميز .

ممكن فى عز الشتا ..

ميكونش فيه ازاز ..

ويا عين أمه بيتنفض من البرد...

وبرده يصبر ..

ماهو مميز

ممكن موبايله ينسرق ..

أو محفظته ..

وبرده يصبر ..

أكيد حرامى مميز ..

يا بخته..

ممكن يسمع كلام فى غاية البذاءة ..

وبرده يصبر
ممكن يشوف حركات فى منتهى القذارة ...

وبرده يصبر..

ممكن شوية منايفة يخنقوه ..

أو يقلبوه..

وبرده بيصبر..

قمة التميز

ممكن واحده تعاكسه ..

ممكن يعاكس واحده ..

وكله بيصبر..

آدى التميز ولا بلاش

ممكن معهوش فلوس ..

وخايف من الكمسرى..

ويركب على الديزل..

مش همه يقع ..

مش همه حر .

ولا همه برد..

وبرده بيصبر...

ياااااه على التميز

مش ملاحظين برده..

زى ما انا ملاحظ ان فيه مواهب كتير بتتفجر فى القطر المميز ...

بس
خلينا دلوقتى فى الصبر..

وفى التميز.
نرجع لصاحبنا المميز ..............فى القطر المميز

تخيلوا انو ممكن يشعبت فى الباب ..

ما هو مفيش مكان ..

وممكن يقع..

ايده تنقطع ..

أو
هدومه ..

مش فارقه ..

لانه برده هيصبر....

ونعم التميز

ممكن بكل سهوله القطر يولع..

حد رمى سجارة..

أو حتى ولع باجور ..

ويموت الاف ..

وهو
بس اتحرقت ايديه ..

ورجليه..

وممكن كمان عينيه..

بس عايش ..

والحمد لله انه عايش ...

بذمتكم
مش عايش برده!!!

وبرده بيصبر ...

لانه بقى عنده عاهة...

يعنى بقى مميز أكتر من الاول
وغزبا عن أهله هيصبر ..

ويحمد ربنا انه عايش ..

ويوجه شكر خاص للحكومه
المصرية ...

اه ماهى صرفت له تعويض ..

أيوه تعويض تأمن له بيه مستقبله...

وما ينفعش
نقول كام ..

عشان ما نغريش الشباب بالتجربه .........
من الاخر أنا وغيرى من المميزين بنحمد ربنا ..لأنه فيه غيرنا من الدول المتقدمة زى
الصومال مثلا مفيهاش قطرنا ...المميز ...بتاع المميزين ...من أمثالى طبعا................