ياااااااااه

بسم الله الرحمن الرحيم
يااااااااااه أخيرا عملت مدونتى الخاصة ولأول مرة باكتب فيها ؛ بجد أنا كان نفسى أكلمكم من زمان واسمع منكم برده أكيد يعنى أصل انا ديموقراطى جدا وديكتاتورى جدا جدا ......لا لا لا بهزر طبعا احنا شبعنا ديكتاتورية وشبعنا استبداد وشبعنا سلبية .
عارفين اكتر حاجه مضايقانى فى أمى.......

اللى هى مصر .....

اللى هى أمكم برده ....

واللى طبعا أم الدنيا بحالها ...

ان شبابها للأسف اتربى على السلبية ..

عارفين يعنى ايه اتربى على السلبية ...

يعنى لو شاف حريقة هيقول وأنا مالى ...

لو شاف سريقه هيقول وانا مالى...

لو شاف خناقه هيقول وأنا مالى ...

لو شاف زحمة.. هيقول لحمه.. ولو مش لحمه ..هيقول وأنا مالى....

لوصحى فى يوم ملقاش ميه .. بس أغسل عينيه ..ولو مفيش مهياش قضيه ..هو انا مالى....

لو شاف صبيه ...على الرصيف مرميه ..وحواليها الكلاب مستنيه ..برده هيقول وانا مالى ....

لو ماشى فى الكلية ..اللى مليانه أمنجية ..وشاف مسيرة سلمية ..هيقول برده وانا مالى....

لو ساكن فى مدينه جامعيه ...وملقاش فى يوم نور ولا ميه ..يقول معلش نعمه فى ايديه..وبكرة تتعدل وحالنا يتبدل...بس برده وأنا مالى ...

خلينى أنا فى حالى ...دا امبارح مشرف جالى ... وقالى انت واحد من عيالى ..قاللى يابنى غلط الصوت العالى ..وخلى بالك انى حطك فى بالى ..
شباب شايف حاجات كتيييييير غلط من صغره ..

وشايف أهله ..

وقرايبه..

وأساتذته..

واصحابه ..

وكل الكبار اللى حواليه ..

كله خايف ...

كله ساكت ..

كله عايز يعيش ويربى عياله ..

ان شالله تولع ....

شايف الظلم فى كل مكان والناس ساكته ..

شايف الاستبداد ..

شايف الديكتاتوريه فى كل مكان من الحضانه للكليه ..

حتى الكليه ..

حتى الكلية مش عارف يتنفس فيها..

أساتذته اللى مفروض قدوته للأسف صاروا هم ازمته..

سايبينه فى محنته ..
كفايه كده لأنى تعبت من الكتابه وان شاء هنكلم تانى عشان نشوف حل للسلبيه اللى احنا فيها دى .....ولا رأيكو نصهين ونكبر دماغنا!!!